الأحد، 2 أكتوبر 2011

شعبان بتاع السمك...!!!!


صور وجدتها من بحث على الانترنت للمكان..الصور ليست من تصويري الخاص..

وأنا صغير ماكنتش باحب السمك..ولحد دلوقتي عندي مشكلة فظيعة في تقشير السمك..بس انا في الكام سنة اللي فاتوا بدأت احب السمك والمأكولات البحرية عامة..ويمكن الحاجة الوحيدة اللي انا ماباكلهاش من المأكولات البحرية هي الاستاكوزا وأم الخلول..

الاسماك البحرية ليها طعم مميز اوي عن السمك النيلي..وبصراحة،احنا المفروض نشكر ربنا ليل نهار على نعمة وجود النيل والبحر الاحمر والمتوسط في مصر..ولكل واحد منهم نوع معين من السمك ولكل نوع من السمك طعم مميز ورائحة مميزة..

وانت في القاهرة او أي مدينة لا تطل على أي من البحرين يبقى انت متعود على السمك النيلي وأشهره البلطي وهو الخيار الاول ليك لو انت عايز تاكل سمك..مع وجود البوري اللي بيتعمل باكتر من طريقة..وكتير بتلاقي انواع تانية من الاسماك البحرية اللي ف حالات قليلة اوي بتبقى فريش او اصطياد نفس اليوم وتبقى محظوظ لو طلبت سمك بحري ولاقيته فريش..ودي بقى الميزة اللي بيتمتع بيها سكان المدن المطلة على أي من البحرين..بصراحة السمك البحري طعمه أحلى بكتير وسوري يعني ( زفارته ) قليلة على عكس السمك النيلي.

اعذروني،انا لو قعدت اتكلم على السمك البحري والنيلي مش هابطل كلام..!

انا ماباروجش اسكندرية نفسها كتير لان انا معظم سفري في المصيف بيكون لمطروح لانها اهدأ وأقل في الزحمة..وربنا يكون في عون اهل اسكندرية في الصيف..! وان كان السمك في مطروح مش حلو زي بتاع اسكندرية لان مطروح مفيهاش ميناء تقريبا وبالتالي الصيد بتاعها بيكون بعيد عن مطروح نفسها..وعشان كده برضه السمك مايكونش طازج.

اسكندرية في الشتاء ليها طعم تاني..واللي بيحب اسكندرية بجد يروحها في الشتاء وانا باروحها اكتر في الشتاء.ومن اول الحاجات اللي بافكر في اكلها وانا هناك السمك..

بعد اللف والدوران..خاصة ان انا مش من محبي المطاعم الفارهة اوي في أكل السمك عرفت اكتر من محل شعبي للسمك في اسكندرية..حمادة دُنجل ( واتمنى اكون باكتبها صح لان في نطق تاني حمادة جُندُل !) و( هو ده شعبان بتاع السمك اللي بيقوله عليه ! ) . ايوه هو اسمه بالكامل كده..!

احد زملائي اللي قضى فترة جيشه في اسكندرية كظابط احتياط كان معايا في احد سفرياتي الشتوية لاسكندرية ووصى بشدة اننا ناكل في هو ده شعبان بتاع السمك اللي بيقوله عليه اللي مجازا هانقول عليه شعبان.

شعبان موجود في وسط اسكندرية ،في المنشية خلف السنترال..وهو موجود في شارع خلفي ضيق والمكان الموجود فيه مش كويس بصراحة..انما احنا كشباب بنتعامل عادي جدا في الموضوع ده المهم الاكل يكون كويس.ودي نقطة مهمة في الموضوع هانرجعلها تاني في وقت لاحق.

المحل عبارة عن محلين جنب بعض.المحل الرئيسي الموجود فيه السمك ومحل تاني جنبه بيعتبر المطعم.وكمان المحل التاني ادامه فرشة صغيرة على الرصيف برضه للاكل.وللاسف مستوى النظافة سيء للغاية والقطط هناك تعتبر اتخن قطط شفتها في حياتي لا وعايشة حياتها تماما في المحل ولا كانه بيتها..!

المرة الاولى اللي رحت فيها شعبان كنا 5 شباب وكان الوقت تقريبا الساعة 2 الظهر وانا اكتشفت لاحقا ان ده افضل معاد لاكل السمك في اسكندرية كلها..

انا عامة في السمك باكل المقلي في المقام الاول والاختيار الثاني بيبقى المشوي ومشتقاته..ده طبعا بخلاف الجمبري واخواته،حكاية لوحدها..!

المهم..شعبان بيديلك اوبشن كتير من محلات السمك حاليا بيعملوه..انك تقوم بنفسك تختار السمك اللي انت عايزه وتحدد شوي ولا قلي وتختار السي فود اللي انت عايزه..وهو بيسجل رقم الترابيزة اللي انت موجود عليها وبيضيف بقى الارز والشوربة ومشتقاتهم.وهنا تظهر اول عيوب شعبان.

شعبان بيعتمد على سعر واحد لكل انواع السمك..يعني البوري والبلطي والاروس والمرجان والدنيس واي نوع تاني ممكن يتواجد عنده ليهم نفس السعر..اخر مرة كان حوالي 40 حنيه للكيلو سواء مقلي او مشوي.وانا الموضوع ده مش عاجبني بصراحة.ازاي يكون سعر البلطي المقلي او المشوي زي سعر البوري زي سعر الاروس مثلا..؟ شتان الفرق بين الانواع دي..ناس تانية ممكن تعتبرها ميزة بس انا مش شايف ده.الجمبري ليه احجام كتير وهو بيقسمه حسب الحجم وبيحاسبك بأسعار قريبة من اسعار القاهرة مفيش مشكلة في الكلام ده.

المهم..،

تبرعت انا وزميلي الاكيل اللي معانا قمنا نختار السمك اللي المعظم مننا اختار سمك بوري مشوي سنجاري..انا بصراحة كنت عايز اكل سمك بحري مقلي..اللي لقيته موجود بحري كان اروس..شفت وزن السمك اللي موجود اقل واحدة كانت كيلو ونص..قلت يلا..نقليها واكل منها والشباب برضه يتسلوا معايا فيها..وانا واقف سخنت على البوري السنجاري فأخدت واحدة صغيرة.زميلي سخن على مرجان اهو نتسلى بيه على ما الاكل ييجي قلت ماشي..وكمان طلبنا 2 كيلو جمبري وسط وشورية سي فود وارز..!

وزنا السمك وحددنا الانواع المشوية والمقلية منه والجمبري والشوربة..اكتشفت ساعتها ان في عنده نوعين من الشوربة..نوع في كوبايات وده بيكون حريف ومكونات السي فود فيه قليلة او معدومة والنوع التاني بيكون في أطباق عادية بس بيكون فيه انواع كتير من السي فود وهي مش شوربة كريمة..لا شوربة عادية..واحنا بما اننا طفسين فطلبنا النوعين..!

المهم..احنا كنا اختارنا ترابيزة بره المطعم في الهواء الطلق..وجالنا بقى السمك بعد فترة انتظار مش قصيرة..الموضوع بدأ بالمرجان اللي كان ظريف جدا ومسلي اوي..وبعدين الشوربة بنوعيها وكانت جيدة جدا..وبعدين نزل الارز وهنا ظهرت مشكلة تانية.

كمية الارز الموجودة في الطبق ماتكفيش طفل رضيع..! وانا باتكلم بجد فعلا الكمية الموجودة في الطبق ممكن تعد فيها حبات الارز بالواحدة.كمية صغيرة جدا بس احنا بصينا ليه على انه زي المقبلات كده وان الاكل نفسه هيكون احسن تعويض لكمية الارز القليلة. وفعلا..!

اول نوع من انواع السمك نزلنا – باعتبار ان المرجان كان تسلية فقط لا غير ! - كانت السمكة الاروس اللي انا اخترتها تتقلي..بصراحة كان طعمها حلو اوي اوي..واللي اكلها واكل البلطي المقلي او البياض المقلي هايعرف الفرق.لحم السمك الاروس لحم ابيض بدون شوك او أي شوائب من اللي احنا عارفينها في السمك..يعني لحم ابيض بجد..السمكة كانت روعه وكان واضح تماما انها لسه طازجة وصيد يومها.

انا انشغلت بقى في السمكة بتاعتي وفي وسط انشغالي لقيت الجمبري وصل..الجمبري هناك غريب شوية..احنا كنا طلبنا الجمبري مقلي،فوجئت ان الجمبري المقلي جاي بقشره..! بالنسبة لي غريبة شوية لما الاقي جمبري مقلي بقشره..انا متعود الاقيه بقشره في الصينية او في الشوربة..انما مقلي بقشره دي جديدة..! بس مش هانكر ان الجمبري كان ظريف اوي وحجمه بعد قليه كان مناسب بالنسبة للديناصورات اللي كانت بتاكل ساعتها.

نزل بقى اخر حاجة السمك البوري بنوعيه السنجاري والمشوي العادي..بصراحة بعد ما اكلت تقريبا كيلو كامل سمك مقلي متمثل في السمكة الاروس اللي انا كلتها والجمبري والمرجان والشوربة والارز كانت السمكة السنجاري دي كماليات مالهاش لازمة..اكلت منها اللي قدرت عليه..بس بصراحة ماعجبتنيش..يمكن يكون نتيجة الاكل الكتير اللي انا اكلته..بس انا حسيت انها مش حلوة..وده كمان كان رأي زمايلي اللي معايا.

زي ما قلت في الاول مستوى النظافة سيء للغاية،وممكن تقعد على ترابيزة ماعليهاش حد وتستنى كتير لحد ما ييجي حد ينظفها اكتر من 10 دقائق..القطط مالية المحل..المحل نفسه في مكان مايفتحش النفس..واخر مرة كنت هناك كان في خناقة رهيبة بين سواقين عربيات اتزنقوا ادام بعض في الشارع الضيق الموجود فيه المحل..الحمامات سيئة للغاية بس فيه مناديل تمسح فيها ايدك بعد الاكل في تناقض واضح..العمال هناك سوقيين جدا..تسألني بقى انت بتاكل هناك ليه مادام انت قرفان منه اوي كده..اقولك لان انا في اوقات مايهمنيش المكان نفسه يهمني الاكل..وده غالبا انا باطبقه لما اكون مع اصدقائي مش مع عيلتي او زوجتي وده الغلط اللي انا وقعت فيه في الزيارة التانية.

يبقى ملخص سريع لكل اللي اتقال فوق..: انا اكلت شوربة سي فود بنوعيها الجداد عليا تماما،ارز،سمك مرجان،سمك اروس،سمك بوري سنجاري . المحصلة النهائية : شوربة السي فود جيدة،الارز مايكفيش طفل رضيع ولا تعتمد عليه،سمك مرجان ظريف للتسخين،سمكة اروس اكثر من رائعة،سمك بوري سنجاري مش اد كده.مستوى المكان سيء جدا.

ودي كانت المرة الاولى اللي اروح فيها لشعبان بتاع السمك..

في تدوينة قادمة ان شاء الله هاتكلم عن زيارتي التانية لشعبان..الزيارة التانية كانت مليئة بالمآسي..! ولكن عشان ما اطولش عليكم المرة دي هاحتفظ بالزيارة التانية لمرة قادمة ان شاء الله.


التدوينة في نقط سريعة :

- النظافة : سيئة . 1/5

- قائمة الاكل : متنوعة. 4/5

- السعر : متوسط. 3/5

- الطعام المقدم : جيد 3/5

- مستوى الخدمة وسرعة تقديم الطلب : 2/5

-

Follow me on Twitter if interested : keldeeb

هناك 9 تعليقات:

  1. لازم أكون أول واحد يعلق ..
    أولاً أنا علي عكسك تماماً ..
    كاره للإسكندرية شتاء وصيف ومتعرفش ليه :)
    مع إن أجدع رجالة فعلاً إسكندرية
    لكن كمدينة وعروس المتوسط والكلام ده مش بياكل معايا ..
    وافضل مطروح عنها بهدوئها وجمالها ..
    =
    بخصوص الأكل البحري فأنا شاكر لك كم المعلومات الرهيبة دي .. لأني تقريباً انقطعت علاقتي بالسمك من فترة طويلة وكل نشاطاتي فيه عبارة عن تونة ورنجة
    ولما بروح دمياط بأروح محل مشهور في رأس البر اسمه سمكمك معرفة واحد صاحبي .. فبيضبطني ..
    غير كده متلاقنيش اشتقت للسمك او رحت اشتريته يعني :)
    ==
    بس ادينا عرفنا ان فيه سمك من غير شوك :]
    وأنا أسمع كتير قوي عن حودة دنجل .. ولي اصدقاء مدمنين له ..
    لكن مسألة النظافة فعلاً مهمة ..
    ودي مشكلة لو معاك المدام والأولاد ..
    أكثر شيء أحييك عليه : استمتاعك بالأكل كمتعة مش أضطرار :)

    ردحذف
  2. صديقي العزيز صديق البلوج..
    اولا انا سعيد جدا بمعرفتك اولا وبردك ثانيا وكفاية اني عرفتك من البلوج فيزيد حبي ليها..!! حته تثبيت اهي..!!

    ثانيا..انا انسان مطروحي..وباروح مطروح سنويا من سنه 92 و يمكن ماتكسرتش القاعدة دي الا سنتين او تلاته بس بصراحةالاكل السكندري واسكندرية في الشتاء ليها طعم تاني خاااالص..!

    وبعدين مش عيب الواحد يستمتع بالاكل..دي من اهم نعم ربنا..وكفاية لما يجيلك برد وتيجي تاكل الاكل تحس انه من غير طعم..! تذوق الطعام نعمة من نعم ربنا الكبرى علينا ربنا يديمها للكل..

    اعتز دائما بردودك المثيرة والمنسقة..واتمنى تكون من المتابعين الدائمين للبلوج..!
    سلامات ياكبير

    ردحذف
  3. بوست لذيذ يا كريم :)
    ده رايك في شعبان؟ مش متخيل هاتقول ايه عن جندل بقى
    ده شعبان نضافته نديها خمس نجوم جنب مستوى نضافة جندل :))
    عاجبني التنويع اللي في البلوج
    مش مركز على مستوى معين او تصنيف معين
    الغالي جنب الرخيص
    عشان كدة مش هاستغرب لو لقيتك بتقيم مطعم في فندق خمس نجوم على النيل والبوست اللي بعده عملته عن حمادة شيراتون بتاع الفول :))
    Keep it up ;)

    ردحذف
  4. @Ali :
    من الناس اللي كنت منتظر ردهم بصفتك اسكندراني قديم..! انا زي ما قلت سمعت عنه جندل بس ماروحتوش..وواضح اني مش هاروحه اصلا..!
    كويس ان انت اخدت بالك من موضوع التنوع في البلوج..المرة الجاية ان شاء الله هتكون عن مكان فعلا 5 نجوم..واللي بعده يمكن برضه 5 نجوم
    شكرا جزيلا يا على

    ردحذف
  5. I ate once or twice before in Dongol 7amada, So I think I don't wanna try another lowllevel cleanliness like sha3ban.
    The issue with these restaurants is their food is really good while paradoxically the environment is really de-appetizing.
    your blog is becoming better and better, the summary card in the end is smart ;)

    ردحذف
  6. صديقي العزيز عمر
    للاسف..الاكل في الكثير من المناطق الشعبية يلزم القليل من التخلي عن بعض الاولويات في مقابل الطعام الجيد..شعبان اكله جيد..ولكنه ليس بالجودة التي تغريني بالذهاب هناك ثانية..!
    And the card,is ur idea dude..!!
    Thanks for the comment buddy.

    ردحذف
  7. http://www.facebook.com/pages/Fish-Restaurants-Shaaban/211269495621814?ref=tn_tnmn

    ردحذف
  8. أزال المؤلف هذا التعليق.

    ردحذف
  9. وهو اسكندريه مفهاش غير جدل وشعبان طالما بتتكلم عن الشعبى يبقى استحمل المعاملة وسوء النظافة اسكندرية فيها أماكن كتير للسمك معروفة ونضيفة زى قدورة

    ردحذف