Beano's cafe - Tahrir كافيه بينوس - التحرير

سلاسل المطاعم و الكافيهات المنتشرة بشدة في القاهرة ومدن أخرى في كتير من الاحيان مابتحتاجش نقد..المستوى غالبا بيكون واحد نتيجة السياسات الواحدة لكل المطاعم دي..لكن لما الاقي تغيير سواء كويس او وحش في أي من سلاسل المطاعم او الكافيهات دي يستحق الكتابة عنه فانا هاتكلم عنه بصراحة زي ما هاتكلم النهاردة عن واحد من سلاسل الكافيهات الكبيرة في مصر.

كنت ف وسط البلد من فترة وكنت عايز اشرب قهوة كويسة واقعد في مكان كويس..وكان معايا زوجتي وابن عمتي والاتنين من محبي القهوة الجيدة ويقدروا يحكموا عليها.

نزلنا ناحية التحرير، هناك من الكافيهات كتير جدا لدرجة ان الاختيار صعب.

المهم..،

الاختيار ف الاخر كان لبينوس Beano’s Café الموجود ادام الجامعة الامريكية وكان الاختيار ده لابن عمتي اللي اختاره لاسباب شاعرية دفينة جواه..!

صراحة اول حاجة تلاحظها وجود واحد مخصص من الكافيه واقف على الباب من جوه بيفتحلك الباب..يمكن تكون حركة بسيطة بس انا باحب اوي الحاجات الصغيرة دي اللي ممكن محدش ياخد باله منها بس صراحة بتعمل معايا مفعول كويس واخدت بالي كمان انه عمل نفس الحركة دي لكل الضيوف غيرنا.كويس.

المكان انا مش محتاج اقول عنه انه نضيف لدرجة كبيرة..الارضيات كلها نضيفة جدا والابواب ماعليهاش بصمات والزجاج كان بيلمع، والترابيزات نضيفة جدا والمنيو كمان موجودة في مكان واضح في نص الترابيزة والترابيزة نفسها منظمة جدا.

اول حاجة تقابلها في الكافيه ان العامل اللي ساعدك في فتح الباب بيسألك مدخن ولا لأ..بصفتنا مش مدخنين اخترنا المكان المخصص لغير المدخنين.وهنا ظهر اول عيوب المكان.

الكافيه عبارة عن دورين،والادارة مخصصة الدور الارضي لغير المدخنين والعلوي للمدخنين.الدور العلوي اولا قريب جدا من الارضي وفرق الارتفاع بينهم بالكتير مترين.وكمان مكان المدخنين مفتوح.وكنتيجة للعاملين دول لو انت مش مدخن مش هاتحس انك في مكان غير مخصص للمدخنين لان كل الدخان من فوق نازل عليك وده عيب من الادارة لازم تشوفله حل وانا كتبته في استمارة ابداء الرأي في اخر الزيارة.

قائمة الكافيه جيدة كما هو متوقع،ومتقسمة كويس جدا.مكان للمشروبات الساخنة والباردة والاكل وكل حاجة مكتوب جنبها مكونات المشروب او الاكل ايه بالظبط وده بيساعد كتير من اللي بيزور المكان اول مرة او مش عارف الاسماء الغريبة لكتير من انواع المشروبات والاكل.

زي ما انا قلت في الاول انا كنت عايز اشرب قهوة،وطبعا طلبت عصير..!!

مكونات العصير اللي انا اخدته كانت مغرية جدا.خوخ وبرتقال وليمون واناناس.اختاروا الفاكهة اللي انا باحبها وعملوها عصير.صراحة انا مش فاكر اسمه بس هو قريب من Tropical Passion او حاجة زي كده.اعذروا الذاكرة بتاعتي..! العصير كان جيد جدا .

زوجتي طلبت كافيه لاتيه وسينامون رولز. انا بصراحة ماقدرتش امسك نفسي واكلت من الرولز وكانت كويسة .صراحة بتاعت سينابون احسن بمراحل بس دي كانت جيدة جدا لمكان مش متخصص في عمل السينامون رولز.

ابن عمتي طلب Club Sandwich وشوكولاته ساخنة زي ما بيحب يقولها.هو بيشكر في الساندويتش وبيقول عليه كان كويس ك Snack وكان فيه كل ما يميز ال Club Sandwich وكان معمول بحرفيه.الشوكولاته الساخنة كانت ريحتها حلوة اوي بصراحة.انا من محبي الكاكاو وخاصة الصحراوي منه وافتكر اني اعرفه من ريحته.النوع اللي هما بيستخدموه هناك غالبا شوكولاته ساخنة مش كاكاو..واللي بيحب الكاكاو يعرف الفرق بينهم.وكان محطوط على وش الشوكولاته الساخنة مارشميلو..واوووو..كان شكله يهبل..!!! انا باعترف اني طلبت شوكولات ساخنة بعد الاغراء اللي حصلي من اللي ابن عمتي طلبها..!!!

بعيدا عن الاكل والمشروبات، انا استخدمت الحمام. احلى حاجة عجبتني في الحمام ان حوائط الحمام والارضية تمثل بالظبط ارضية وحوائط حمام بيتنا..! الواحد كان سعيد والله..كفاية ان انا مش حاسس بالغربة في حمام الكافيه...!!! طبعا نظافة الحمام ممتازة واقولها بصراحة انه بيعتبر من انضف الحمامات اللي انا دخلتها في كافيه او مطعم.بس بصراحة يمكن يكون ده نتيجة ان انا رحت في وقت الكافيه فاضي فيه ومفيش فيه عدد كبير بس افتكر اني غلطان في الكلام ده.

في اثناء وجودنا في الكافيه مر علينا مرتين مدير المكان واكد ان المشروبات والاكل كان على المستوى المطلوب وانا شكرت في المكان ادامه وبصراحة دي حاجة نادرة.

جلستنا استمرت حوالي ساعتين.واحنا خارجين برضه الشاب الظريف اللي ساعدنا في فتح الباب اثناء الدخول برضه ساعدنا اثناء الخروج..مش قلتلكم عجبتني اوي الحركة دي..!

مفيش حاجة ضايقتني الا موضوع دخان السجائر اللي انا قلت عليه واتمنى لو زرت المكان مرة تانية تكون المشكلة دي اتحلت.

انا كنت زرت فرع الكافيه في سيتي ستارز بس بصراحة بتاع وسط البلد احسن بمراحل.بس ما انساش اقول ان الاقبال على فرع وسط البلد اقل بكتير من سيتي ستارز.وطبعا الزحمة ليها دور كبير في التقصير في الخدمة. والمطعم او الكافيه الجيد هو اللي يقدر يخدم ضيوفه في اوقات الزحمة او الاوقات الفاضية بشكل متساو.

نهاية، في أي وقت من الاوقات اكون فيه في التحرير او وسط البلد هايكون Beano’s Café الجامعة الامريكية من اول الاماكن اللي ممكن تخطر على بالي لقهوة او عصير جيد ومناخ مناسب الى حد ما.

Follow me on Twitter if interested : keldeeb