الثلاثاء، 2 أبريل، 2013

Steak Out, All American dining experience.

ازيكم ؟؟
بقالي كتير ماكتبتش هنا، صح ؟؟ ليه مش عارف !!
كتبت ليه النهاردة ؟؟ لان المطعم اللي رحته مؤخرا فعلا يستحق التدوين عنه !
بدون مقدمات، هانتكلم  النهاردة عن Steak Out.
المطعم ده امريكي خالص، والاكل بتاعه امريكي تماما، يعني لو نفسك في شوية محاشي او كبده اسكندراني، ماتروحش هناك !
Steak Out ليه اكتر من فرع في مصر، الفرع الاساسي بتاعه وهو في ش. عبدالمنعم رياض في الدقي، سيتي ستارز، Oasis في مساكن شيراتون و6 اكتوبر.
انا رحت المكان الاساسي ليه في القاهرة في الدقي، العنوان بسيط خالص، والparking هناك كويس نسبيا مقارنة بالدقي، انا رحت يوم جمعة الساعة 8 تقريبا.
يقال ان المكان محتاج حجز، احنا كنا فردين واتصلت قبل ما اروح قالي مش محتاج حجز، يمكن عشان كنا فردين بس، يعني لو هاتروح حاول تتصل قبلها هشان لو في حجز اليوم مايروحش عليك :)
اول ماتدخل المكان هايقابلك المترودوتيل، شاب لطيف وانيق هيسألك كام فرد ويخليك تختار المكان بنفسك، المكان عبارة عن صالة طويلة والترابيزات متوزعة فيها على الاجناب، يستحسن تاخد في النصف الاخير من المكان لانه بعيد عن الشارع و هادي.
ديكورات المكان اكتر من هايلة، حاجة كده contemporary، الاضاءة واضح تماما انها بسيطة عن قصد، عشان تاخد راحتك في الاكل، الفكرة دي عجبتني جدا.
بعد بالظبط دقيقتين من دخولنا المكان، جالنا شاب لطيف وعرف نفسه بالاسم وادالنا المنيو وحط ادامنا ازازة مياه مشبرة وكوبايتين، وكالعادة فتح الازازة وصب في الكوبايات، تدبيسه بقى بس عادي :)
بصراحة انا كنت مذاكر المنيو تماما وانا رايح، المنيو موجودة على الموقع بتاع Steak Out وكمان فيسبوك بتاعهم وموقع elmenus، واللينكات في اخر الريفيو.
انا باعتقد تماما ان اي منيو كبيرة في الحجم وفيها اصناف كتير من الاكل، بتديلك ايحاء ان المكان مش متخصص في نوع معين من الاكل، وبالتالي اكله كله مش كويس، بس ده مش موجود في Steak Out. المنيو لطيفة جدا، ومتقسمة كويس جدا، فيها انواع الشوربة، مقبلات، لحوم مشوية، وفراخ بانواعها واكل بحري وانواع تحلية مختلفة وانواع مختلفة من المشروبات والكوكتيلات.
المكان زي ماهو واضح من اسمه بيقدم استيك، وانا بصراحة من محبي الاستيك جدا، والمنيو اللي بيقدمها فيها انواع كتير من الاستيك البقري وال rib eye، وزي ما هو بيقول، ان كل منتجات الاستيك بتاعته بتكون مستوردة وبصراحة بعد اللي اكلته انا اقتنعت بالموضوع ده.
انا طلبت  Steak Out Fillet وزي ما هو واصفه هو عبارة عن 375 جم من لحم الاستيك الصافي، وطبعا كل الاطباق اللي بيقدمها بيقدم معاها نوعين من side dishes، ارز، خضار سوتيه، باستا، ذرة حلوة، بطاطس بيوريه او فارم فريتس. انا طلبت ارز وخضار سوتيه. وكمان النوع المفضل من الصوص بتاعك، انواع الصوص، فلفل، جبنة او ليمون. الطلب التاني اللي طلبناه كان Chicken Curry Sauce وكانت معاه side dishes ذرة حلوة وخضار سوتيه. وطلبنا كمان شورية كريمة فراخ.
بعد 7 دقايق بالظبط نزلنا عيش وزبدة كمقبلات، العيش بصراحة هايل ومقدملنا دافئ، تقريبا بيتخبز عندهم، ونزل معاهم شوربة الفراخ. الشوربة بصراحة رائعة، يمكن احسن شوربة فراخ شربتها في حياتي، و الthickness بتاعتها مثالية، وكمان الميزة انها متقدمة بالدرجة المثالية من السخونة، يعني مش سخنة اوي تلسعك ولا باردة ممكن تخليك تزهق منها او تبرد منك في الاخر.
بعد حوالي تلت ساعة من وصولنا وصل الاكل، تحبوا اوصفلكم ولا مش عايزين تجوعوا ؟!
نوصف :)
ارز بسمتي هايل، التتبيلة بتاعتها ممتازة، وريحتها فريش تماما، وكمية مناسبة جدا، خضار سوتيه العادي اللي متعودين عليه، اصلا الخضار السوتيه مفيهوش ابداع يعني، وانواع الخضار اللي قدمها، كوسة، بطاطس، فاصوليا وجزر.
ندخا بقى على الاستيك، انا طلبته medium rare، يعني نص سِوا بالبلدي، وخلي بالك، كل انواع الاستيك اللي بتتقدم هناك بيعملوها well done الا لو طلبت حاجة تانية.
الاستيك بقى راااااااااااااااااائع، احلى قطعة لحمة اكلتها في حياتي بدون مبالغة مع اني من محبي اللحوم وباكل منها انواع مختلفة ومن كل المطابخ العربية والشرقية والغربية بس بدون مبالغة الاستيك هايل، طريقة تسويته كمان مثالية، الmedium rare كما اُنزل فعلا.
اما الطبق التاني اللي طلبناه، كان اكتر من ممتاز، لمحبي الفراخ يعني، وصوص الكاري المقدم معاه كمان رائع، والميزة زي ما قلت، thickness اكتر من ممتازة.
مش عايز اطول عليكم، بس التجربة اكثر من رائعة، والمكان يعتبر من اكتر الاماكن النضيفة اللي زرتها مؤخرا، ومستوى الاكل كمان ممتاز جدا، الستاف متعاون جدا.
نتكلم شوية عن الماديات عشان تبقى عارف، الاكل اللي طلبناه كلفنا تقريبا 200 جنيه، واحنا فردين، وخلي بالك كمان ان في نسبة 22% خدمة وضريبة مبيعات، بس بصراحة المكان يستاهل.
نصيحة، خد وقتك تماما في الاختيار والسؤال عن الاكل خاصة ان المنيو كبيرة جدا، وحاول تشوف الموقع الرسمي بتاع المطعم و فيسبوك بتاعه كمان عشان تكون واخد فكرة مسبقة عن الاكل، بس عامة الSteak و الRib eye هما اهم حاجة عنده.

التدوينة في نقاط سريعة :
-النظافة : 5/5
-قائمة الاكل : 4/5، وده لان انواع الاكل كتير جدا وهتحتار فعلا في الاختيار، خاصة ان في انواع مختلفة من الصوص والاضافات اللي ممكن تطلبها وممكن تلخبطك.
-السعر:5/5، زي مابيقولوا  value for money، يعني هتدفع وانت مبسوط، بس تكون عارف هتاكل ايه، واوعى تتكسف تسأل على نوع الاكل بيتعمل ازاي او ايه الاضافات المناسبة عليه.
-الطعام المقدم : 5/5.
-مستوى الخدمة وسرعة تقديم الطلب : 5/5.
-الجو العام للمكان : 5/5.

الموقع الرسمي ل Steak Out :
http://www.steakout-wg.com/index.php

صفحة فيسبوك :
http://www.facebook.com/pages/Steak-Out/197275760354074

اللينك الخاص بيه على موقع elmenus :
http://www.elmenus.com/cairo/restaurants/steak-out-1755

Follow me on Twitter if interested : keldeeb
Official Twitter account for the blog : foolwfahita

الثلاثاء، 25 أكتوبر، 2011

كبده البرنس..!

النهاردة الريفيو من زميلة وصديقة تويتر د/ زينب مطاوع

د/ زينب عاملة ريفيو من اوله لاخره بمجهودها وتجربتها وتشكر عليه تماما، نبص ع الريفيو سوا.


كبده البرنس

مساء الخير عليكوا.

أنا هتكلم معاكوا النهارده عن تجربتى فى مطعم البرنس ...بس قبل ما أبدأ ... عاوزه أتكلم فى نقطه هى من وجهة نظرى مهمه جدا ..ألا و هى :

إن الأكل ده مزاج و كل وقت و له أدان !!! بمعنى إن كل مكان هتاكل فيه ...و كل أكله هتاكلها لازم تبقى منسجمه مع الحاله النفسيه و المزاجيه إلى إنت فيها ... علشان فعلا تقدر تستمتع بالأكل و بالمكان و الصحبه كمان ...و يبقى إنطباعك إلى هتاخده عن المكان ده يبقى موضوعى و منطقى .... يعنى مثلا:

لما تبقى فى مود رومانسى و عاوز تقعد فى مكان هادى ...و شاعرى و الخدمه فيه "كلاسى " أو أنيقه ...ما تروحش تاكل فى البرنس مثلا!! ... يعنى ساعات بتبقى محتاج تاكل فى مطعم إيطالى خمس نجوم ... و ساعات بتبقى طالبه معاك بيتزا و حاجه ساقعه .... و ساعات بتبقى زهقان من الفاست فود و نفسك تاكل أكل بيتى... نفسك تاكل أكل طعمه فعلا حلو...بس تبقى خارج بره مع أصحابك أو حد إنت بتحبه ... نفسك تبقى قاعد فى جو كده يحسسك إنك فعلا بتاكل فى مصر...حاجه كده زى جو خان الخليلي مثلا ... هنا بقى يبقى بنتكلم عن البرنس J

هو موجود فى إمبابه ..تحديدا :
87
ش طلعت حرب
امبابة, الجيزة

أول ما هتروح هناك هتاخد بالك على طول إن المكان زحمه جدا و خاصة أيام الأجازات .. و هو عامل قاعده بره المطعم و حاطط ترابيزات و كراسى ... و هتشوف كمان الأكل و هو بيتعمل قدامك ...و الريحه بقى ... تهبل ! هتلاقى ناس عماله تقطع فى لحمه و كبده و فى حته كده إسمها ملوخيه ستيشن و دى بيعملوا فيها الملوخيه...

و هتاخد بالك كمان من مستوى الناس إلى قاعده تاكل ..و العربيات اللى راكنه جنبه ... هتعرف على طول إن الراجل ده جامد ! و إنه فعلا متميز و مشهور

بالنسبه للخدمه ف إنت أول مل هتوصل عند الباب .. لو فيه ترابيزه فاضه هتلاقى واحد هيوصلك ليها على طول بعد ما يعرف إنت معاك كام فرد .. لو مافيش مكان .. هيكتب إسمك و هتستنى شويه و هيقعدك أول مل ترابيزه تفضى.. إحنا كنا فردين و ما و قفناش أكتر من دقيقتين و قعدنا على طول مع إنه كان يوم جمعه ... الناس إللى بتشتغل هناك شكلها ودوود إلى حد ما و بيضحكوا فى وشك ...بالرغم من الضغط الرهيب فى الشغل...أول مل هتقعد على الترابيزه هيتقدملك الميه

و هيتحط قدامك المنيو

إللى هى من وجهة نظرى مرضيه جدا لمعظم الأذواق جميع أنواع الكبد ... جميع أنواع الطواجن ... فى أصناف كتيره من الرز و المكرونه ..فيه حوواوشى ... فى فتة موزه و كوارع و ممبار ...طاجن حمام بالرزالأمريكى " معرفش يعنى إيه بس كان مكتوب كده "و طبعا الملوخيه ...واللحمه المحمره ,,و اللحمه الضانى و بيقولوا عندهم خروف محشى بالرز الأمريكى لو إنت جعان قوى يعنى ! و أكيد السلطات كلها موجوده و فى كمان شوربة كوارع ...و شوربة لسان عصفور

بالنسبه لنظافة المكان فبالرغم من إنى أكلت فى الترابيزات إللى بره ... يعنى فى الشارع .... و أنا من النوع إللى بيفرق قوى معايا موضوع النضافه ده ...لكن أنا فعلا ما حسيتش للحظه إن فى تقصير فى الناحيه دى ... يعنى كنت باكل و أنا مبسوطه و من غير مشكله و نسيت تماما إنى مش باكل جوه المطعم نفسه ..يعنى الأرضيات و االترابيزات ما شوفتيش فيهم حاجه تدل على عدم نضافتهم ..

بعد ما طلبنا الأوردر بتاعنا .. فى دقايق إتحطت السلطات " سلطه خضرا ..بابا غنوج .. و طرشى و باذنجان مخلل" و فى أنواع تانيه لو إنت حابب تطلبها ...و إتحط العيش ... عيش فريش و بلدى " و دى حاجه مهمه جدا بالنسبه لى "

إحنا طلبنا إتنبن طاجن رز باللحمه ... نص كيلو كبده مشويه بالفلفل الأخضر ... نص سجق معمول فى صوص طماطم ..و ملوخيه..

الأكل وصل فى خلال 10 دقايق ... أنا ماحسيتش إنه إتأخر خالص... و كان سخن طبعا و ريحته تقطع القلب J

بالنسبه للأكل و دى أهم نقطه ... يعنى هى دى الحاجه إللى كل الناس دى جايه علىشانها ... الأكل كان تحفه ...يعنى يفكرك بأكل أشطر ست بيت عندك فى العيله ...ست كده نفسها حلو فى الأكل زى ما بيقولوا .....يعنى أكل معمول بفن و حرفيه عاليه ...معمول بمزاج ...أكل معمول للأكيله ، حتى طاجن الرز هو عباره عن رز أبيض بالشعريه عادى خالص و محطوط عليه شرايح لحمه ...بس الرز نفسه فعلا كان طعمه حلو ...و دى نادره جدا إن يعجبنى رز أكلته بره البيت ...لأنى مابحبش الرز إلا يكون معمول بسمن بلدى أو زيت دوار شمس أو الإتنين مع بعض ... بس الرز ده فعلا كان طعمه حلو ... الملوخيه طبعا كانت تجنن و التقليه بتاعها و قوامها مظبوطين ..و فعلا هايله ...الكبده كانت حلوه جدا ... مستويه كويس..و السجق بصراحه أنا مش بحبه قوى بس هو كان طعمه حلو قوى بس أنا ما أكلتش منه كتير ... و السلطات كانت حلوه أنا بصراحه نسيت فى أغلب الوقت إنى آكل السلطات علشان الأكل كان مش محتاج حاجه تحليه ...!

يبقى كده الأكل لا غبار عليه ... و أنا كمان سمعت سمع خير إن شاء الله إن المكرونه و فتة الموزه و الممبار بتاعه خرافه ...بس طبعا أنا ماقدرتش أجرب كل ده فى مره واحده

الجو العام ... زحمه مووت و دوشه حبتين ... بس ده مناسب مع المود العام للمكان ... فبتلاقى نفسك مش متضايق ... الحاجه الوحيده إللى كانت هتضايقنى هى إنى كنت ألاقى المكان مش نضيف ..أو الأكل ما عجبنيش و ده الحمدلله ما حصلش

نيجى بقى للأسعار ... هى الأسعار فى المجمل متوسطه ... يعنى و لا هتتصدم من كتر المبلغ و لا كمان هتتفلجىء من قلته ! يعنى الحاجات إللى أنا قلت عليها فوق و معاهم بيبسى ب 220 جنيه ... و بالنسبه للأسعار إللى أنا متعوده أسمعها ...فده مقبول جدا

على فكره الأكل ده إحنا كنا إتنين ما قدرناش نخلصه و أخدنا بقيته تيك أواى.... و لازم تبقى عارف إن بعد الأكله بتاعت البرنس دى ... هيجيلك حاله من التتنيح و تبقى مفتح عينيك كده و ممكن بقك ...و مش فاهم و لا حاسس بأى حاجه بتحصل حواليك ...ده عاااادى خالص ...دى أعراض طبيعيه ...أصل الأكل دسم حبتين ... ف نصيحتى إنك تروح كوفى شوب محترم و تشرب مشروب يحتوى على نسبه محترمه من الكافيين ..علشان تقدر تتعامل و ترجع طبيعى !

إجمالا .. التجربه دى عجبتنى ... و عجبنى الأكل و الفكره نفسها ...و أكيد هروح تانى و أجرب حاجات جديده ...

هو ماعندوش أصناف للتحليه ...و ده عادى فى المطاعم إللى زى دى ...

هو فى بس حاجه صغيره حصلت بس لازم أقولها ... أن إحنا طلبنا إتنين شوربة لسان عصفور ... بس إتنسوا و ما إتقدموش لا قبل الأكل ولا معاه ... و إحنا ما أخدناش بالنا إلا لما خلصنا أكل أصلا " الأكل كان منسينا نفسنا ! ، بس لو كنا طلبناهم كانوا جابوهم طبعا ... و ده أكيد كان من الضغط الرهيب اليوم ده ... يعنى أنا مش زعلانه برضه مع إنى بحب الشوربه !.. أكل البرنس بيطلع الإنسان الكويس إللى جواك ...هى دى أخلاق الثوره إللى بيقولوا عليها .

ف الخلاصه ... لو بتقدر الأكل الحلو ...نفسك تاكل أكل بيتى نضيف و مظبوط ...و زهقان من الأكل بره ...نفسك تغير و تروح مكان جديد ... علشان تاكل أكل شدييد J... يبقى لازم تجرب البرنس ...

رأيى في نقط سريعة :

- النظافة : جيدة جدا . 5/4

- قائمة الاكل : متنوعة و ترضى معظم الأذواق.5/4.5

- السعر : مناسب و معقول جدا.5/3.5

- الطعام المقدم : ممتاز 5/5

- مستوى الخدمة وسرعة تقديم الطلب :جيد جدا 5/4

و بالهنا و الشفا ...

تحياتى ,

الأربعاء، 19 أكتوبر، 2011

ابو طاهر الكبابجي..!


صورة للاكل المقدم في ابو طاهر॥من تصويري الخاص



الكباب والكفته من الاكلات اللي المصريين بيعزوها اوي وانا منهم..يعني تلاقي حد واحد سعيد ومبسوط جدا..في ايه يا سيدي..اصلي واكل كباب وكفته او معزوم على كباب وكفته..!

الكباب والكفته مش اكله مصرية في الاساس..ناس كتير بتقول ان منشأها شامي..

محلات الكباب والكفته عامة بتقدم كمان انواع كتير من المشويات والغير مشويات..طرب ونيفه وحمام مشوي وحمام محشي وفراخ مشوية وانواع تانية كتير.. صحيح، اللي يعرف يقولي النيفه دي ايه من غير سيرش على جوجل هاديله 2 جنيه وربع..!

المهم..،

في احد المناسبات السعيدة بعد ما نجحت في امتحان الماستر..اتعزمت على كباب وكفته..وطبعا زيي زي كل المصريين كنت فرحان جدا..كنت انا وابن عمتي – هو هو اللي كان معانا في بينوس للي قرأ التدوينة الثانية – وهو اللي كان عازمنا وزوجتي وحماتي وققرنا التوجه الى ابو طاهر الكبابجي الموجود في ميدان الجيش.

الاساطير الاغريقية القديمة تقول ان ابو طاهر كان عربية مشويات زمان في ميدان الجيش..ونظرا لان الحالة اتحسنت والبلية لعبت ففتح محل كبير للمشويات.

وانت رايح هناك اوعى تتلخبط..في عربية فعلا في الميدان اسمها ابو طاهر الكبابجي..نفس الاساطير الاغريقية القديمة بتقول ان العربية دي تقليد والمحل هو الاصل..مصدر الاساطير الاغريقية القديمة دي هي هي نفسها ابن عمتي..!

قبل ما ندخل في أي تفاصيل للمكان نفسه..لازم نعرف حاجة مهمة بالنسبة للاكل المشوي..

محلات كتير من المشويات بتسلق اللحمة بتاعتها قبل الشوي..يعني لحمة الكباب عامة بتتسلق قبل ما تتحط على الشواية..انا عرفت ده من مصدر موثوق منه في احد المحلات..اهي المحلات دي بقى اللي اوعى تاكل فيها..اكلها حلو اه بس بيفقد الكتير من الطعم في حركة السلق دي..ابو طاهر من المحلات اللي بتشوي اللحمة مباشرة ودي طبعا Bonus في حقه.

نرجع لموضوعنا..

ابو طاهر مكانه مش كويس ومش وحش..يعني قريب جدا من العتبة ووسط البلد والموسكي والازهر والحسين..وبصراحة يعني انا مش ممكن احكم على محل حسب مكانه..اللي عايز ياكل اكل كويس ياكل في أي مكان..في رأيي انا النظافة في المقام الاول هي اللي لازم يتحكم عليها وبكل حزم.

انا من الناس اللي بتشوي في البيت..عندي الشواية والعدة بتاعت الشوي كلها..والحمد لله بشهادة الجميع باشوي كويس..باشوي لحمة بكل انواعها وفراخ..انما الكفته بقى بتكون صعبة جدا عليا لانها محتاجة خليط من انواع مختلفة من لحوم الضاني والبتلو وكمان خلطة بهارات وبصل وحاجات تانية..وانا بالرغم من حبي للطبخ عامة والكفته خاصة الا اني ماليش في الموال ده كله. وبالتالي لما اروح محل كباب وكفته بيكون تفكيري الاول في الكفته والطرب لاني باكل كباب وفراخ مشوية في البيت..

كنا في ابو طاهر تقريبا الساعة 6 المغرب..واحنا داخلين المحل لقينا الستاف كله واقف في المدخل..مش عارف ليه..لقيت الطباخين والجرسونات كلهم واقفين في المدخل..حركة مش كويسة لاننا كان معانا سيدات..

المحل واضح عليه انه متجدد من 3 او 4 سنين..يعني نظام الرخام في الحوائط والارضيات سيراميك جديد نسبيا والترابيزات برضه عليها رخام.

في دخولك المطعم بتلاقي صالة طويلة ادامك وعلى شمالك الشواية...وبعدين بتلاقي صالة تانية في اخر الصالة دي يمين فيها حوالي 5 ترابيزات تانية..المحل مساحته معقولة للاعداد الكبيرة.

احنا قررنا نقعد في الصالة التانية الجانبية..اول ما دخلنا لقينا واحد من العاملين في المطعم قاعد على ترابيزة وبيتغدا..عادي مش مشكلة..من حق كل مواطن انه يتغدى في مكان شغله..الراجل اعتذر وقام بسرعة.

قعدنا على ترابيزة كويسة..كانت نظيفة مسبقا وماكانش عليها أي اثر من اكل أي حد قبل كده..طبعا جالنا واحد من العاملين ف المحل..تؤمروا بايه يا باشاوات..؟ اللي اتضايقت منه اوي انه مفيش خالص عندهم ارز او مكرونات ولا شوربة..انا عارف انه محل مشويات بس الارز والمكرونات بالنسبة لي مهمة..انا مش ممكن اكل كباب وكفته بس..اعصابي هاتتعب..!

طلبنا الاكل المعتاد..1/3 مشكل..بس حماتي ماكنتش عايزه تاكل لحوم..فوجئت للمرة التانية ان مفيش فراخ مشوية..ازاي يعني..؟ يعني الارز والمكرونة مبلوعة..الناس متخصصة ف المشويات..انما الفراخ المشوية..! صعبة اوي..! لقينا حمام مشوي و محشي في مفارقة غريبة..الفراخ اللي هوب هوب بتتشوي في ثواني مش موجودة والحمام اللي بيتسلق ويتحشي ويتشوي موجود..نعتبرها تخصصات برضه..!! المهم ، حماتي طلبت حمام محشي..

كالعادة وككل المطاعم المصرية، السلطات..سلطة خضراء وطحينة وسلطة بابا غنوج..مستواهم جيد مش بطالين.. حاجة تانية لازم تتكتب في أي ريفيو عن مطعم كباب وكفته.. العيش ، العيش في كتير من المحلات بيكون بايت من اليوم اللي قبله او صغير زي التوست كده..بصراحة العيش كان كويس وحجمه مناسب..بالنسبة للاكل بقى..

اولا الاكل اتأخر شوية..ماكانش في المطعم الا احنا وترابيزة تانية..فلما الاكل يتأخر نص ساعه في الظروف دي ،ايه اللي ممكن يحصل في الايام الزحمة..؟ مع اننا ماطلبناش اكل غريب يعني..اصلا المنيو مش متخمة اوي..!

انا اكلت كباب و كفته وطرب..انما من محبي الطرب والكفته اصلا ده غير عدم قدرتي على عملهم في البيت..بس الملاحظ ان الكمية كانت صغيرة جدا..يعني هما بالظبط 5 قطع..التلت اصلا في محلات الاكل بيكون تمن+ربع.. وانا ماحستش انهم ربع اصلا..بس الاكل عامة جيد جدا مش بطال..يعني ممكن يكون مميز عن كتير من محلات الكباب والكفته خاصة انه مش بيسلق الاكل الاول..شوي على طول زي ما قلت فوق.

انا ما اكلتش من الحمام طبعا بس كان واضح ان حماتي مش متضايقة من الاكل..يعني واضح انه كان كويس.

مستوى الخدمة العام في المكان مش بطال..يعني المكان نظيف والترابيزات نضيفه والحمامات كمان نضيفه..الحمام فيه ولد مسئول عن المناديل والنظافة على طول..الاحواض كمان نضيفة..المكان بشكل عام نضيف ولا يعيب عليه ابدا قلة النظافة.

انا عن نفسي مستعد تماما للاكل تاني في ابو طاهر..انا اكلت في محلات كتير اوي للكباب والكفته..بس ابو طاهر هيكون على القائمة في مكان متقدم عن كتير منهم..من ضمنهم ابو شقرة وابو رامي..

ملحوظة : لسه ملاحظ حالا اني كتبت ابو رامي وابو طاهر وابو شقرة وهما من اهم محلات الكباب في مصر..!

في رأيي الخاص،احسن مكان اكلت فيه كباب وكفته في مصر.. عبده كفته في مطروح..! وليه ريفيو مستقل في مرة تانية ان شاء الله.

التدوينة في نقط سريعة :

- النظافة : جيدة جدا . 4/5

- قائمة الاكل : غير متنوعة . 3/5

- السعر : جيد جيدا. 4/5 ملحوظة : انا كنت معزوم...بس واضح على ابن عمتي وهو بيحاسب انه كان مبسوط..!

- الطعام المقدم : جيد جدا. 4/5

- مستوى الخدمة وسرعة تقديم الطلب : سيئة . ३/5


Follow me on Twitter if interested : keldeeb

Official Twitter account for the blog : foolwfahita

الخميس، 6 أكتوبر، 2011

نولا كاب كيك..!

صناعة الحلويات منتشرة للغاية في القاهرة ومعظم المدن المصرية..وظهرت مؤخرا الكثير من سلاسل مطاعم الحلويات تألق منها البعض وفشل البعض..وان كان الكتير مننا بيحب جدا الحلويات والحمد لله برضه مابنتخنش..!

وانا من محبي الحلويات وخاصة الغربي منها وماليش تقل على الانواع الشرقية الا مارحم ربي وساعة المزاج فقط لاغير.

انا تقريبا باكل كل انواع الكيك ومشتقاته خاصة الشوكولاته منها..وانواع تانية من الحلويات هاتكلم عنه ان شاء الله في مرات قادمة.

من فترة وانا على تويتر اكتشفت مكان لتصنيع نوع جديد من الحلويات الغربية في القاهرة..لا ولما سألت عنه لقيت ناس كتير اوي بتشكر فيه..اللي شدني اكتر فيه انه بيعمل نوع مش بيتعمل كتير في الحلويات الغربية وكمان الانواع اللي بيعملها منه صورها حلوة جدا على النت..وانا من محبي التجارب.

المكان ده بيعمل كاب كيك Cupcakes ..بيني وبينكم الفكرة شدتني جدا..لان انا اتعودت اوي اوي على الجاتوه والتورت وكل انواع الشوكلات كيك والانواع التانية من الحلويات الغربية..وانا بارحب جدا بأي تغيير.

المكان هو Nola Cupcakes الموجود في الزمالك.

نولا موجود في شارع البرازيل في الزمالك..وانا باروح الزمالك تقريبا فقط للتوجه لساقية الصاوي فمعرفتي بالزمالك قليلة اوي..اول حاجة فكرت فيها عشان اعرف المكان بالتفصيل هو سؤال المسئول عن اكاونت نولا على تويتر، وانا كنت لاحظت ان المسئول عن الاكاونت تقريبا بيرد على كل اللي بيسأله،فأنا قررت اسأله انا كمان..وجالي الرد يمكن في فترة صغيرة وبالتفصيل..وانا احيي فيهم ده جدا..انا باسمي ده الدعم الفني..زيه بالظبط زي الدعم الفني بتاع شركات النت..الا ان دعم نولا الاونلاين كان سريع وفعال!

العنوان سهل جدا..اي حد متوجه للزمالك من كوبري 26 يوليو،ينزل من الكوبري في شارع 26 يوليو بعد من 200-300 متر هتلاقي بنزينة على يمينك..البنزينة دي على ناصية شارع البرازيل..ونولا كاب كيك هو تاني او تالت محل على ايدك الشمال في شارع البرازيل..وعنوانه تفصيلا..4 شارع البرازيل-الزمالك.

المحل ليه جو مخصوص وسلوجان مخصوص ظريف..

تدخل المكان تلاقي على ايدك الشمال مكان عرض الكاب كيك وواقف فيه الموظف المخصص لخدمتك..الموظف الواقف لابس يونيفورم شكله ظريف جدا بس في حاجة لفتت انتباهي انه مفيش Name Tag ،سوري..يمكن ناس كتير تقولي ايه التفاهة دي بس انا باهتم ساعات بحاجات صغيرة..انا دايما باحب اعرف اسم اللي باتكلم معاه..حتى لداعي الالفة..بس دي نقطة انا ماهتمتش بيها اوي..

على ايدك اليمين موجود ترابيزتين من النوع العالي وليهم الكراسي الخاصة بيهم..ترابيزتين باستايل المكان وشكلهم كمان مميز اوي..ولكل واحدة الاضاءة بتاعتها..شكلهم ظريف.

في اخر المكان على اليمين بعد الترابيزات موجود سلم ابيض من النوع الحلزوني..بصراحة نسيت اسأل هو ده لمكان قاعدة فوق غير اللي تحت ولا ده لمكان صناعة الكاب كيك..فاتت عليا واعترف..بس اتمنى انه يكون مكان مخصص لقعدة تانية غير اللي تحت لان تحت ترابيزتين بس..واتمنى يكون المكان اوسع من كده.

المهم..،

انا وانا رايح في بالي اصلا اطلب كاب كيك شوكولات..الكاب كيك المعروض بصراحة كان فيه انواع مغرية جدا.. الانواع اللي انا شفتها..شوكولاته،موز،جزر،جزر بعين الجمل او الجوز مش عارف – ولا يمكن هما الاتنين حاجة واحدة !- ،مارون جلاسيه ، شوكولاته بالنوتيلا وتويكس – واااو ! - ، فانيلا وانواع مختلفة من الوان الفانيلا، بلوبيري ، زبدة الفول السوداني و Sprinkeld Chocolate .

كمان لقيت ميني كاب كيك..كاب كيك صغير وتقريبا بنفس انواع الحجم العادي..شكله صغير وظريف..والنوع اللي انا جربته منه كان Oreo’s mini ودي انا اخدتها وانا هناك في المحل..بصراحة طعمها رهيييب..!!!

انا كان في بالي اخد انواع من الكاب كيك للبيت عشان اجربه انا وزوجتي..زوجتي من محبي الفراولة..وانا مالقيتش فراولة..!! زعلت اوي،بس لقيت فانيلا لونها بينك فقلت اخد منها لانها اقرب نوع للفراولة..واخدت فانيلا عادية واتنين شوكولاته وواحدة شوكولاته Sprinkles ..اخدت في الاخر 6 قطع.

عندهم هناك انواع كتيرة من العلب الTake away ، 4و6و12 وعلب اكبر كمان للطلبيات الخاصة॥والعلب مصممة حلو اوي بصراحة..ومصممة مخصوص عشان تاخد الكاب كيك كلها بحيث انها ماتتحركش من مكانها..ودي حلوة اوي للي بياخدها مسافات بعيدة عشان ماتتقلبش بقى وتبقى العملية كلها باظت..لازم احييهم عليها بصراحة।كمان العلبة نفسها شكلها حلو اوي وواخدة نفس ثيم المكان..وكمان الشنطة اللي شلت فيها العلبة..حلوة جدا وليها نفس شكل العلبة والثيم بتاع المكان..التركيبة كلها على بعض كويسة وفخمة.

نيحي بقى لمرحلة التذوق..

نولا كاب كيك تعتبر من احسن انواع الكيك اللي انا اكلتها..!

كل الانواع اللي انا دقتها كانت حلوة جدا جدا..الشوكولاته بنوعيها والفانيلا بنوعيها والاوريو كمان..ميزتها انها فريش..

ماقدرش انكر ان في انواع تانية من الكيك كان نفسي ادوقها خاصة النوتيلا مع تويكس..يعني هما بصراحة اختاروا النوعين اللي انا باحبهم من الشوكولاته وعملوا ليها كاب كيك..! وكمان بيقولوا ان في شوكولاته توبليرون بيضاء White Toblerone ..افتكر هاتكون حلوة جدا..انواع الكيك عندهم كتير ومهما كان ذوقك،افتكر هاتلاقي اللي يعجبك هناك..!

نولا كمان بتقدم انواع مختلفة من المشروبات..اسبرسو ولبن بارد وسخن وكمان انواع مختلفة من الشاي..بس انا ماجربتش حاجة منهم..الكلام ده انا جايبه من الموقع بتاعهم.

بالنسبة للاسعار..سعر الكاب كيك الواحدة يتراوح بين 8.5 ل 15 جنيه حسب النوع..وانا شايف انه سعر جيد جدا خاصة ان واحدة ممكن تكون كفاية لكتير بس مش ليا انا بصراحة..! والاوردر بتاعي كان 6 قطع ب 62 جنيه..بصراحة السعر مناسب للكمية والجودة.

نولا كاب كيك تعتبر من انواع الكيك الجيدة جدا وتقترب من الامتياز في رأيي..وكمان انصح أي حد يجربها انه ياكلها في نولا نفسها..لانها ساعة لما تكون في المحل نفسه بتكون محفوظة في درجة حرارة مناسبة جدا للاكل..وكمان لو اخدتها بره في احتمال كبير جدا تسيح زي ما حصل معايا..!

نولا ليهم ديليفري لاي مكان في الزمالك واماكن تانية في وسط البلد على حسب الموقع الرسمي بتاعهم.. وهما مالهمش فروع حاليا في أي مكان في القاهرة غير الزمالك..واتمنى جديا يفتحوا فروع في اماكن تانية مع الاحتفاظ بنفس درجة الجودة اللي بتتقدم في فرع الزمالك..ويابخت اهل الزمالك بنولا.. انا لو كنت هناك افتكر كانت هاتبقى ال dessert اليومية هناك..بس انا جديا لما انزل الساقية في أي يوم اكيد هاعدي على نولا واخد كاب كيك هناك..تجربة ممتازة انصح بيها بشدة.

- موقع نولا على الانترنت : http://www.nolabakery.com

- تويتر : @NOLACupcakes

- فيسبوك : http://www.facebook.com/NOLACupcakesEgypt

وطبعا ممكن في اي وقت تدخل على اي من المواقع اللي فوق دي وهاتشوف صور كتير جدا للمكان وانواع الكاب كيك

وكمان،ممكن تسألهم عن أي حاجة انت عايزها سواء على تويتر او فيسبوك..بيردوا على طول..!

التدوينة في نقط سريعة :

- النظافة : جيدة جدا . 4/5

- قائمة الاكل : متنوعة الى حد كبير . 4.5/5 *ملحوظة : اتمنى اضافة الفراولة للقائمة..!

- السعر : جيد جيدا. 4/5

- الطعام المقدم : ممتاز . 5/5

- مستوى الخدمة وسرعة تقديم الطلب : 5/5

*ملحوظة II : في فترة وجودي في المكان مالقيتش Suggestion box..مهم جدا لمكان لسه في البداية عشان يعرف آراء الناس بصورة اكبر وأشمل. يمكن يكون موجود بس انا ما اخدتش بالي منه لان زيارتي كانت قصيرة جدا.كمان هما بيهتموا بالردود جدا سواء على تويتر او فيسبوك،بس وجود ال Suggestion box في المكان نفسه ليه طعم تاني.

Follow me on Twitter if interested : keldeeb

الأحد، 2 أكتوبر، 2011

شعبان بتاع السمك...!!!!


صور وجدتها من بحث على الانترنت للمكان..الصور ليست من تصويري الخاص..

وأنا صغير ماكنتش باحب السمك..ولحد دلوقتي عندي مشكلة فظيعة في تقشير السمك..بس انا في الكام سنة اللي فاتوا بدأت احب السمك والمأكولات البحرية عامة..ويمكن الحاجة الوحيدة اللي انا ماباكلهاش من المأكولات البحرية هي الاستاكوزا وأم الخلول..

الاسماك البحرية ليها طعم مميز اوي عن السمك النيلي..وبصراحة،احنا المفروض نشكر ربنا ليل نهار على نعمة وجود النيل والبحر الاحمر والمتوسط في مصر..ولكل واحد منهم نوع معين من السمك ولكل نوع من السمك طعم مميز ورائحة مميزة..

وانت في القاهرة او أي مدينة لا تطل على أي من البحرين يبقى انت متعود على السمك النيلي وأشهره البلطي وهو الخيار الاول ليك لو انت عايز تاكل سمك..مع وجود البوري اللي بيتعمل باكتر من طريقة..وكتير بتلاقي انواع تانية من الاسماك البحرية اللي ف حالات قليلة اوي بتبقى فريش او اصطياد نفس اليوم وتبقى محظوظ لو طلبت سمك بحري ولاقيته فريش..ودي بقى الميزة اللي بيتمتع بيها سكان المدن المطلة على أي من البحرين..بصراحة السمك البحري طعمه أحلى بكتير وسوري يعني ( زفارته ) قليلة على عكس السمك النيلي.

اعذروني،انا لو قعدت اتكلم على السمك البحري والنيلي مش هابطل كلام..!

انا ماباروجش اسكندرية نفسها كتير لان انا معظم سفري في المصيف بيكون لمطروح لانها اهدأ وأقل في الزحمة..وربنا يكون في عون اهل اسكندرية في الصيف..! وان كان السمك في مطروح مش حلو زي بتاع اسكندرية لان مطروح مفيهاش ميناء تقريبا وبالتالي الصيد بتاعها بيكون بعيد عن مطروح نفسها..وعشان كده برضه السمك مايكونش طازج.

اسكندرية في الشتاء ليها طعم تاني..واللي بيحب اسكندرية بجد يروحها في الشتاء وانا باروحها اكتر في الشتاء.ومن اول الحاجات اللي بافكر في اكلها وانا هناك السمك..

بعد اللف والدوران..خاصة ان انا مش من محبي المطاعم الفارهة اوي في أكل السمك عرفت اكتر من محل شعبي للسمك في اسكندرية..حمادة دُنجل ( واتمنى اكون باكتبها صح لان في نطق تاني حمادة جُندُل !) و( هو ده شعبان بتاع السمك اللي بيقوله عليه ! ) . ايوه هو اسمه بالكامل كده..!

احد زملائي اللي قضى فترة جيشه في اسكندرية كظابط احتياط كان معايا في احد سفرياتي الشتوية لاسكندرية ووصى بشدة اننا ناكل في هو ده شعبان بتاع السمك اللي بيقوله عليه اللي مجازا هانقول عليه شعبان.

شعبان موجود في وسط اسكندرية ،في المنشية خلف السنترال..وهو موجود في شارع خلفي ضيق والمكان الموجود فيه مش كويس بصراحة..انما احنا كشباب بنتعامل عادي جدا في الموضوع ده المهم الاكل يكون كويس.ودي نقطة مهمة في الموضوع هانرجعلها تاني في وقت لاحق.

المحل عبارة عن محلين جنب بعض.المحل الرئيسي الموجود فيه السمك ومحل تاني جنبه بيعتبر المطعم.وكمان المحل التاني ادامه فرشة صغيرة على الرصيف برضه للاكل.وللاسف مستوى النظافة سيء للغاية والقطط هناك تعتبر اتخن قطط شفتها في حياتي لا وعايشة حياتها تماما في المحل ولا كانه بيتها..!

المرة الاولى اللي رحت فيها شعبان كنا 5 شباب وكان الوقت تقريبا الساعة 2 الظهر وانا اكتشفت لاحقا ان ده افضل معاد لاكل السمك في اسكندرية كلها..

انا عامة في السمك باكل المقلي في المقام الاول والاختيار الثاني بيبقى المشوي ومشتقاته..ده طبعا بخلاف الجمبري واخواته،حكاية لوحدها..!

المهم..شعبان بيديلك اوبشن كتير من محلات السمك حاليا بيعملوه..انك تقوم بنفسك تختار السمك اللي انت عايزه وتحدد شوي ولا قلي وتختار السي فود اللي انت عايزه..وهو بيسجل رقم الترابيزة اللي انت موجود عليها وبيضيف بقى الارز والشوربة ومشتقاتهم.وهنا تظهر اول عيوب شعبان.

شعبان بيعتمد على سعر واحد لكل انواع السمك..يعني البوري والبلطي والاروس والمرجان والدنيس واي نوع تاني ممكن يتواجد عنده ليهم نفس السعر..اخر مرة كان حوالي 40 حنيه للكيلو سواء مقلي او مشوي.وانا الموضوع ده مش عاجبني بصراحة.ازاي يكون سعر البلطي المقلي او المشوي زي سعر البوري زي سعر الاروس مثلا..؟ شتان الفرق بين الانواع دي..ناس تانية ممكن تعتبرها ميزة بس انا مش شايف ده.الجمبري ليه احجام كتير وهو بيقسمه حسب الحجم وبيحاسبك بأسعار قريبة من اسعار القاهرة مفيش مشكلة في الكلام ده.

المهم..،

تبرعت انا وزميلي الاكيل اللي معانا قمنا نختار السمك اللي المعظم مننا اختار سمك بوري مشوي سنجاري..انا بصراحة كنت عايز اكل سمك بحري مقلي..اللي لقيته موجود بحري كان اروس..شفت وزن السمك اللي موجود اقل واحدة كانت كيلو ونص..قلت يلا..نقليها واكل منها والشباب برضه يتسلوا معايا فيها..وانا واقف سخنت على البوري السنجاري فأخدت واحدة صغيرة.زميلي سخن على مرجان اهو نتسلى بيه على ما الاكل ييجي قلت ماشي..وكمان طلبنا 2 كيلو جمبري وسط وشورية سي فود وارز..!

وزنا السمك وحددنا الانواع المشوية والمقلية منه والجمبري والشوربة..اكتشفت ساعتها ان في عنده نوعين من الشوربة..نوع في كوبايات وده بيكون حريف ومكونات السي فود فيه قليلة او معدومة والنوع التاني بيكون في أطباق عادية بس بيكون فيه انواع كتير من السي فود وهي مش شوربة كريمة..لا شوربة عادية..واحنا بما اننا طفسين فطلبنا النوعين..!

المهم..احنا كنا اختارنا ترابيزة بره المطعم في الهواء الطلق..وجالنا بقى السمك بعد فترة انتظار مش قصيرة..الموضوع بدأ بالمرجان اللي كان ظريف جدا ومسلي اوي..وبعدين الشوربة بنوعيها وكانت جيدة جدا..وبعدين نزل الارز وهنا ظهرت مشكلة تانية.

كمية الارز الموجودة في الطبق ماتكفيش طفل رضيع..! وانا باتكلم بجد فعلا الكمية الموجودة في الطبق ممكن تعد فيها حبات الارز بالواحدة.كمية صغيرة جدا بس احنا بصينا ليه على انه زي المقبلات كده وان الاكل نفسه هيكون احسن تعويض لكمية الارز القليلة. وفعلا..!

اول نوع من انواع السمك نزلنا – باعتبار ان المرجان كان تسلية فقط لا غير ! - كانت السمكة الاروس اللي انا اخترتها تتقلي..بصراحة كان طعمها حلو اوي اوي..واللي اكلها واكل البلطي المقلي او البياض المقلي هايعرف الفرق.لحم السمك الاروس لحم ابيض بدون شوك او أي شوائب من اللي احنا عارفينها في السمك..يعني لحم ابيض بجد..السمكة كانت روعه وكان واضح تماما انها لسه طازجة وصيد يومها.

انا انشغلت بقى في السمكة بتاعتي وفي وسط انشغالي لقيت الجمبري وصل..الجمبري هناك غريب شوية..احنا كنا طلبنا الجمبري مقلي،فوجئت ان الجمبري المقلي جاي بقشره..! بالنسبة لي غريبة شوية لما الاقي جمبري مقلي بقشره..انا متعود الاقيه بقشره في الصينية او في الشوربة..انما مقلي بقشره دي جديدة..! بس مش هانكر ان الجمبري كان ظريف اوي وحجمه بعد قليه كان مناسب بالنسبة للديناصورات اللي كانت بتاكل ساعتها.

نزل بقى اخر حاجة السمك البوري بنوعيه السنجاري والمشوي العادي..بصراحة بعد ما اكلت تقريبا كيلو كامل سمك مقلي متمثل في السمكة الاروس اللي انا كلتها والجمبري والمرجان والشوربة والارز كانت السمكة السنجاري دي كماليات مالهاش لازمة..اكلت منها اللي قدرت عليه..بس بصراحة ماعجبتنيش..يمكن يكون نتيجة الاكل الكتير اللي انا اكلته..بس انا حسيت انها مش حلوة..وده كمان كان رأي زمايلي اللي معايا.

زي ما قلت في الاول مستوى النظافة سيء للغاية،وممكن تقعد على ترابيزة ماعليهاش حد وتستنى كتير لحد ما ييجي حد ينظفها اكتر من 10 دقائق..القطط مالية المحل..المحل نفسه في مكان مايفتحش النفس..واخر مرة كنت هناك كان في خناقة رهيبة بين سواقين عربيات اتزنقوا ادام بعض في الشارع الضيق الموجود فيه المحل..الحمامات سيئة للغاية بس فيه مناديل تمسح فيها ايدك بعد الاكل في تناقض واضح..العمال هناك سوقيين جدا..تسألني بقى انت بتاكل هناك ليه مادام انت قرفان منه اوي كده..اقولك لان انا في اوقات مايهمنيش المكان نفسه يهمني الاكل..وده غالبا انا باطبقه لما اكون مع اصدقائي مش مع عيلتي او زوجتي وده الغلط اللي انا وقعت فيه في الزيارة التانية.

يبقى ملخص سريع لكل اللي اتقال فوق..: انا اكلت شوربة سي فود بنوعيها الجداد عليا تماما،ارز،سمك مرجان،سمك اروس،سمك بوري سنجاري . المحصلة النهائية : شوربة السي فود جيدة،الارز مايكفيش طفل رضيع ولا تعتمد عليه،سمك مرجان ظريف للتسخين،سمكة اروس اكثر من رائعة،سمك بوري سنجاري مش اد كده.مستوى المكان سيء جدا.

ودي كانت المرة الاولى اللي اروح فيها لشعبان بتاع السمك..

في تدوينة قادمة ان شاء الله هاتكلم عن زيارتي التانية لشعبان..الزيارة التانية كانت مليئة بالمآسي..! ولكن عشان ما اطولش عليكم المرة دي هاحتفظ بالزيارة التانية لمرة قادمة ان شاء الله.


التدوينة في نقط سريعة :

- النظافة : سيئة . 1/5

- قائمة الاكل : متنوعة. 4/5

- السعر : متوسط. 3/5

- الطعام المقدم : جيد 3/5

- مستوى الخدمة وسرعة تقديم الطلب : 2/5

-

Follow me on Twitter if interested : keldeeb