السبت، 24 سبتمبر 2011

فتحي بتاع الكبده..!

صورة للاكل المقدم في المطعم، الكمية اللي قدامكم دي 1/3 كبده :) من تصوير صديقي @zeyseeker

انا من محبي الكبده..! ايه المشكلة يعني..؟ لا، وكل انواع الكبده..!
في السيدة زينب في واحد بتاع كبده اسمه فتحي.
بالصدفة ، عرفت انه عمل التجديدات اللي انا شفتها هناك من فترة مش كبيرة..المحل كان عبارة عن محل صغير على ناصية في شارع بورسعيد وحاليا عمل تجديدات بقت مش بطالة.
بما اني من محبي الكبده فأنا رحت هناك كتير اوي وفي أوقات مختلفة من اليوم..العصر والمغرب وبالليل اوي..يعني تقريبا في اي وقت غير صباحا اللي انا مش ممكن اكل فيه كبده..!
المهم..
المحل عبارة عن دورين،دور ارضي ودور علوي..الارضي عبارة عن الفرشة في الشارع بترابيزات بلاستيكية وليه الجارسون الخاص بيه ودور علوي بترابيزات ثابتة وكراسي من المعدن اللي مستحيل تقريبا تحركه من مكانه الا لو كنت صاحب عضلات..!
قائمة طعام المطعم هي كبده بانيه ومخ بانيه وجمبري باحجامه التلاته وسمك فيليه،ودي ميزة كويسة لان اكيد اي حد رايح هناك معاك هياكل..انا أكلت كل اصناف الاكل اللي هناك بس بما أنكم عرفتوا فعلا اكتر حاجة اكلتها الكبده..!
الدور الارضي اللي هو الفرشة ف الشارع الخدمة فيه على غير المتوقع ممتازة..الشاب اللي بييجي يخدم الترابيزة صراحة سريع وبيقدم الاكل بنشاط ملحوظ.عكسه بقى اللي في الدور اللي فوق،تقيل وغلس وليه وضع معين لازم ياخده وهو بيسمع الطلب بتاعك..اللي هايروح هناك اكيد هايفتكرني وهو بيطلب..!
قائمة الاكل هناك جيدة ومنوعة لافراد كتير..السلطات اللي بتنزل بصراحة مميزة،خضراء وطحينة وخيار مخلل ممتاز بمعنى الكلمة وسلطة كبده واللي مش عارفها مايقوليش هي ايه لان انا مش هاعرف اوصفها بس هي حلوة..!
الاكل هناك بصراحة جيد جدا..مستوى الكبده والجمبري والسمك الفيليه والمخ كويس جدا..وميزة انا شايفها كويسة ان الاكل على طول طازج وسخن..ودي ميزة مش موجودة في مطاعم تانية اللي بتعتمد على اكل يكون مجهز سابقا وبيعاد تسخينه عند التقديم.الميزة في فتحي ان الاكل فعلا بيبقى سخن ومن النار رأسا اليك زي ما بيقولوا.
بعد الاكل اول حاجة بتفكر فيها هي الحلويات او المشروبات.مفيش حلويات، في المشروبات الغازية المعتادة وانا ماقدرش اخد عدم وجود حلويات كنقطة سلبية لانه مطعم في منطقة شعبية..وبعدين انت في كل الاحوال في السيدة..يعني مكان الحلويات الشرقية الاول في مصر..وهانرجع لموضوع حلويات السيدة زينب بعدين ان شاء الله.
فتحي مافيهوش الا حمام واحد وحوضين لغسيل الايد منفصلين عن الحمام..ودي برضه مش حاجة وحشة لان فترة وجودك في المحل ماتزيدش عن نص ساعة فغالبا استخدامك للحمام هايكون قليل.انا ماستخدمش الحمام قبل كده فمش هاقدر احكم عليه.انما الاحواض دائما نظيفة والصابون متوافر وكمان مناديل لمسح الايد.
اكل فتحي رخيص وفي نفس الوقت في رأيي انا جيد. لو انت في السيدة او وسط البلد وعايز تاكل اكل كويس وقد ميزانيتك الخربانة زيي، هاتتبسط عند فتحي.

هناك 11 تعليقًا:

  1. ليا تعليق بسيط بردو .الاضاءه فى المحل ده وبالذات فى الدور اللى فوق سيئه جدا تديك احساس انك قاعد فى كهف واضاءه صفراء فبالتالى مزوده احساس الحر وخصوصا ان التكييف مش قوى اوى ووضع التليفزيون سئ جدا لانه تقريبا فى ضهر نص الناس او على الجنب فمش كل حد يقدر يشوفه بس هو تجربه مش بطاله وخصوصا لمحبى الكبده واصحاب الجيوب المخرومه .وفى الاخر بقى مبروك على المدونه وحاسه انها فكره جديده وكويسه ومش موجوده فى مصر اللى المفروض ان شعبها ماشاء الله من الشعوب الاكيله والذواقه فى العالم .Keep up tnhe good work وفى انتظار المزيد

    ردحذف
  2. و الله جميله و موضوع تقييم الاماكن عموما شحيح فى سوق الكتابه
    انا سعيد انى اول عضو فى البلوج و شكرا و تمنياتى بالتوفيق

    ردحذف
  3. @kokilina
    انا معاكي ان الاضاءة سيئة..صراحة انا كنت هناك بالليل وكانت جيدة الى حد ما.يمكن اما كنت انت هناك كان في عطل او حاجة.اما بالنسبة للتليفزيون فانا مش معاك في ان التليفزيون في الاماكن دي مهم لانه مكان شعبي في المقام الاول وكمان انا ضد وجود تليفزيون في المطاعم اصلا! انا رايح اكل واتمتع بالاكل.وغالبا لو رحت،مش هلاقي اللي التليفزيون مشغله عاجبني!!
    ميرسي ليك بجد واتمنى تتابع معايا كمان في الايام الجاية.
    @محمد خضر
    شكرا ليك يا محمد.انا سعيد جدا انك من متابعي المدونة واتمنى تتابع معايا اكتر في الايام الجاية

    ردحذف
  4. I was fasting when I was reading this post and pity me!! My mouth was watering
    I am not a big fan of outdoors kebda since Dad is the greatest kebda chef alive on earth but I think fathi is worth a try with you soon, treating me over, right?

    ردحذف
  5. @mero
    انت عارف اد ايه انا مهتم برأيك..ميرسي لاهتمامك واتمنى تتابع المدونة على طول وتقول رأيك بصراحة..!

    ردحذف
  6. انا اول مرة بحب اقول تعليق - بجد ربنا يباركلك - كل ما نزلت الي القاهرة جاء صديق وارسلني الي هذا المطعم وكنا بشخر رمضان - اول مرة بحياتي اجلس بالشارع وسط الناس ووسط الناس الجميلة والود الحب الدافي لبلادنا القاهرة - بجد انك وصفت المكان ممتاز جدا لانة بيستاهلا كل اهتما والاجمل بقي الكبدة رائعة اول مرة اكلها كدة والسلكطات ممممتازة قوي قوي

    ردحذف
  7. محمد طارق محمود المزنى29 يناير 2012 في 5:19 م

    ده افضل ما فى المحل الجرسون الى فى الدور العلوى بس هو من ضغط الشغل عليه بيبقى متعصب شوية بس هو من اركان الشغل وبقاله فيه حوالى 13 سنة

    ردحذف
  8. محمد المزنى29 يناير 2012 في 6:34 م

    بجد كل ما فى المحل جميل الكبدة والسلطات وكل حاجة بس فى ناس زملكاوية كويسين بس لو يشجعو الاهلى والريال يبقى كدة تمام

    ردحذف
  9. حاجة تفتح النفــس :D

    ردحذف
  10. فتحي لسه وكله عنده من شويه

    ردحذف
  11. انا ساكن في نفس شارع اللي في فتحي هو تحفة بس غالى

    ردحذف